Olona miisa 25 ankehitriny no alaina ambavany tao amin’ny kaomisaria ao Ambanja taorian’ny hetsika fitsaram-bahoaka nahafatesana polisy iray tao Ambanja ny sabotsy lasa teo.
Raha ny fanazavana voaray, dia nisy tamin’ireto olona ireto no nitolo-batana ary nisy ny olona nisy nitory na nanome vaovao mikasika ity raharaha ity. Fantatra moa fa nandray an-tanana izao raharaha izao ny OMC, ivondronan’ny mpitandro filaminana miaraka, izay ahitana ny polisy sy ny zandary ary ny manam-pahefana any an-toerana.
Tsiahivina moa fa namita iraka tao amin’io tanànan’Analabe io ireo polisy 3 niaraka tamin’ny mpitari-dalana iray. Voalaza mantsy fa misy ny tambazotra mpanao trafika rongony tao amin’io toerana io, ka izay no antony nahatonga azy ireo ho any an-toerana.
Tsy araka ny nampoizina anefa ny zava niseho rehefa niditra ny Tanàna izy ireo, satria dia efa lasa nitsoaka ireo olona izay voalaza fa mpanao trafika rongony. Nifanehitra tamin’ny sefo Fokon-
tany sy andiam-pokonolona kosa ireto polisy niaraka tamin’ilay mpitari-dalana, ka notondroin’ireo vahoaka ho mpamadika avy hatrany ilay mpitari-dalana. Nokasain’ny vahoaka hatao fitsaram-bahoaka izy io teo, ka raikitra ny famonoana. Nanaovan’ny olona tambabe araka izany ireo polisy 3 lahy sy ilay mpitari-dalana, ka maty teo ilay polisy iray, ilay mpitari-dalana kosa naratra mafy, raha afaka nitsoaka ireo polisy 2 hafa. Ilay polisy AP 2 Fiana Leonard Jean Patrick no namoy ny ainy tamin’izao fitsaram-bahoaka izao. Mbola tsaboina any amin’ny hopitaly kosa ilay mpitari-dalana naratra.
TR
Imprimer