Mihorohoro noho ny fahatahorana ho tratry ny aretina coronavirus ny mponina any amin’ny tanàna ambanivohitr’Amoron’I Mania ka tsy mahasahy mivoaka ny trano. Manararaotra izany ny olon-dratsy amin’izao fotoana fiakaran’ny vary eny an-tsaha izao. Nanaovan’ny andian-jiolahy mitam-basy latsak’alina ny tanimbary iray. Fongana tanteraka ny vary efa niandry hojinjaina. Nitondran’ny olon-dratsy fiara mihitsy nitaomana azy.
Ny faran’ny herinandro lasa teo no nitrangan’ny fanafihana tany amin’ny tanàna iray ambanivohitr’Ambositra. Rehefa avy nitety ireo tokantrano vitsivitsy teo an-tanàna ny mpanafika, dia tsy nijanona hatreo fa naka izay rehjetra sendra azy. “Tsy mijanona amin’ny fandrobana omby ao am-bala intsony ny dahalo. Alainy avokoa izay sendra azy na ombin-tsarety, na entana ao an-tokantrano na fitaovan-dakozia ary hatramin’ny voly eny an-tsaha”, hoy ny fitarainan’ny tantsaha. Matahotra ny olona ka tsy mahasahy manohitra.
F.A
Imprimer
